建議一個統計七一遊行數字的方法

〈建議一個統計七一遊行數字的方法〉

前日遊行完，今日已經等唔切下年七一，想再去多次遊行。今年遊行完咗之後，民陣稱有七萬六千人參加，警方就話得二萬八千人。果然又係咁，年年都係咁，又係口同鼻拗。好多人質疑警方數字報細數，當然亦有人質疑主辦單位報大數，於是就有人建議將民陣數字加上警方數字再除二，咁就會比較貼近真實數字。我對於呢類數字爭拗已經感到好厭煩，不如諗吓下次遊行可以點樣計得準確啲仲好。

大家都知道，遊行動輒上萬人，用肉眼點算當然唔準確，不過警方話俾我哋聽，佢哋就真係用肉眼點算嘅，佢哋個數有幾可靠，大家可以自行評估。其實要準確知道有幾多人參加遊行並非真係咁困難，以下我就建議一個方法俾主辦單位參考，下次遊行不妨使用：

呢個方法簡單到不得了，就係派貼紙。首先，主辦單位可以印定數十萬張貼紙，搵義工喺維園各出入口派發俾遊行人士。貼紙唔能夠太細張，亦唔需要太大張，大概兩吋半乘兩吋半就可以。貼紙印上簡單而有象徵意義嘅圖案(當然最好要靚)，中間留返一啲空位，啲空位有咩用我會等陣再講。主辦單位呼籲所有參加遊行嘅人士都記得要將貼紙貼喺身上，以便計算遊行數字。當然並非人人都喺維園出發，所以主辦單位同時要喺沿路各個check point安排義工派發貼紙俾身上冇貼紙嘅人，確保中途加入或退出嘅人士都可以被計算在內。

當遊行人士行到政府總部嘅時候，呢堆貼紙仲可以回收再用(要環保嘛)。事先準備定幾百塊紙板，俾遊行人士將身上嘅貼紙轉貼上去。剛才提到貼紙中間嘅空位部份，遊行人士可以響上面寫上訴求(當然空位有限，字數不能太多)。收集到幾百塊貼咗幾萬個貼紙嘅紙板之後，就交俾euyak之類嘅青年藝術家將啲紙板即席砌成藝術品(砌成紙製國殤之柱仲好)。呢個寫滿遊行人士心聲嘅藝術品，先讓傳媒影一輪，之後再當成紀念品咁致送俾特首，要求政府派代表出嚟接收。

成個遊行完咗之後，就統計派咗幾多貼紙出去、仲淨返幾多貼紙。得出嘅數字雖然冇可能百分百準確，但相信點都會可信過警方個數字。如果信唔過主辦單位，怕佢哋報大數，大可以委託獨立嘅專業核數師去做。咁嘅話相信左中右人士都冇嘢好講。

呢個方法當然唔係完美。總會有人唔拎貼紙又或者會有人一個貼兩張。不過呢啲都只係少數人，個誤差唔會好大。就好似平時我哋收集簽名咁，有啲人可能簽咗唔止一個名，不過我哋唔會太計較，一萬五千個簽名就會當有一萬五千人。反正而家唔係要準確到個位數字，只要準確到千位或萬位數字就夠啦。

以上呢個計算方法有咩好處呢﹖

一、夠簡單方便，唔駛太多工夫。

二、夠可靠，派出幾多張貼紙就至少有幾多人，冇得呃。

三、容易認出自己友。有貼紙嘅就係自己友，非常容易認。有時遊行隊伍兩旁總有人圍觀、影相，如果佢哋有貼貼紙，就可以計埋佢哋。

四、成本低。只係買多幾十萬張貼紙，成本唔會貴得去邊。用唔晒仲可以留俾下次遊行用添。

五、冇咁形式化。年年行完就走，起碼都要整返啲紀念品俾政府嘆吓吖﹗

六、遊行人士嘅意見可以直接上達。就算特首唔睇，起碼傳媒可以更了解到市民嘅心聲。

七、踢爆警方低估數字、淡化遊行。遊行之後，警方例必報細數，呢個統計方法可以踢爆警方嘅謊言，等市民以後都唔信警方報嘅數字。甚至可以藉住計算警方報細咗幾多成，去反推算歷年遊行嘅真實數字。

八、可以計算埋有幾多市民行畢全程、幾多人中途退出。由於行畢全程嘅市民會響政府總部外將貼紙轉貼落啲紙板度，只要計吓個紙板藝術品上面有幾多張貼紙，就可以計到有幾多人係中途退出。

九、由於有紀念品(其實即係市民嘅心聲)要致送，可以大條道理逼政府派代表出來接收，唔俾佢哋龜縮埋一二邊唔理我哋。

可能會有人話，駛乜咁執着個遊行數字吖﹖俾你知道係二萬八定七萬六咁又點﹖有好大分別咩﹖我會咁答：首先，二萬八同七萬六真係有好大分別。第二，呢個唔止係數字問題，同時係誠信同原則問題。如果明明有七萬人，警方擘大眼講大話話得二萬人，咁就有違誠信，警隊嘅威信就蕩然無存。第三，我哋有責任為歷史留下一個真實嘅紀錄。

以上方法，好希望主辦單位可以考慮採用。當然，我估佢哋未必諗唔到呢個方法，只不過如果用咗呢個方法，仲邊有咁易報大數吖。唉。